إيييه نيّالو

فاطمة عمراني

الخميس، السابع عشر من تشرين الأول، الساعة 5 مساء..

مقتطف من حوار شابّتين في سرفيس “مهاجرين صناعة” من أمام موقف كلية هندسة المعلوماتية على طريق المطار إلى البرامكة:

+ شفتي سعيد الطالب يلي معنا بالكلية، من السنة الأولى بيعرف يصمم ألعاب.

– أي طبعاً مفكرتيه متلنا مبتدئات، أبوه مهندس معلوماتية بكون متعلم ع التصميم والبرمجة من زمان.

تنهيدة مشتركة: “إيييه نيالو”

+ سعيد عم يشتغل بشركة مهمة وبعدو طالب، وعم يطلّع هديك الحسبة.

– إي بكون مدعوم، نحنا بكرا رح نحفى لنلاقي شركة نتدرب فيها بعد التخرّج، وبسمع إنو في شركات بتستغل المتدرّبات وفي بعض المدراء بيتحرّشوا بالبنات، مو متل سعيد يلي أكيد ما بيتعرض لهيك مواقف لأنو شب.

تنهيدة مشتركة: “إيييه نيالو”

+ بدّي إفهم كيف سعيد شاطر بالجامعة ومرتبط كمان؟

– إي سعيد ملحّق على كلشي، شب حلو ودارس وبيشتغل بشركة محترمة وبيطلّع مصاري منيح، ما بظن ولا بنت رح ترفضو، بعدين هو شب بيقدر يبادر ويحكي مع أي بنت، مو متلنا، إذا أعجبنا بشب عيب نقلو.

تنهيدة مشتركة: “إيييه نيالو “

+ بس ما لا حظتي إنو اليوم تأخرنا شوي بالرجعة على البيت

– مبلا، وبعرف إنو رح آكل بهدلة من أهلي، أبي ما بيسمحلي ارجع عالبيت متأخرة، بس لو كنت شب فيي إرجع بنص الليل عادي، شوفي سعيد كيف بيرجع متأخر على بيتو.

تنهيدة مشتركة: “إيييه نيّالو”

+ سعيد بيتأخر لأنو عم يعمل دورات برمجة احترافية بمعهد، في دورات صباحية تسجلي؟

– لا، تخيّلي إصحى بكير كرمال صير محترفة، أنا كبنت مو ضروري إشتغل، كتّر خيري إني عم ادرس، ماني مضطرة تعّب حالي وإشتغل، أهلي بيصرفوا عليي.

+ صح، على عكسنا، سعيد وكل الشباب ضروري يكونوا مستقلّين مادّياً.

– إي نحنا أهلنا بيصرفوا علينا، ولما نتزوج الزوج رح يصرف علينا، صح عم ندرس بس مو المهم نشتغل، المهم يكون معنا شهادة للأيام الصعبة إذا تطلقنا أو ترمّلنا يكون فينا نشتغل.

+ بتعرفي طلعت حياة الشباب كتير متعبة، نحنا البنات في مين يصرف علينا ومو مضطرين نشتغل ونتعّب حالنا.

تنهيدة مشتركة مع ضحكة عالية: “إيييه نيالنا”.

الأيام

شارك على:

Share on facebook
Facebook
Share on telegram
Telegram
Share on twitter
Twitter
Share on whatsapp
WhatsApp

شارك رأيك

يرجى تعبئة الحقول أدناه لاطلاعنا على شكواك….لا تقلق سنعرض اسمك ممثلاُ بأول حرفين من الاسم والكنية.

ارســـل

شكوى

يستخدم الموقع ملفات تعريف الارتباط للتأكد من حصولك على أفضل تجربة في موقعنا، تعرف اكثر